მერვე დღის რეფლექსია

       დღეს განვიხილეთ პრეზენტაციისა და კოლაბორაციული შეფასების რუბრიკები. დეტალურად გავიარეთ კოლაბორაციულ რუბრიკაში პროექტში მონაწილე მოსწავლეთა ჯგუფებად დაყოფის პრინციპი. ასევე, მათი უნარებისათვის შესაფერისი კონკრეტული დავალებების სწორად შესარჩევად გავეცანით კონელის კითხვარს. აღნიშნული კითხვარი გამოვაქვეყნეთ ჩვენი პროექტის ბლოგზე, საიდანაც თავად მოსწავლეებიც შეამოწმებენ საკუთარ შესაძლებლობებს.
       ფოსტაში დრაივზე არსებული პორტფოლიო ავტვირთეთ ბლოგზე. პორტფოლიოში ჩვენი პროექტის სახელწოდებასთან დავამატეთ ფოსტის დრაივის ლინკიც.

კონელის კითხვარი – მრავალმხრივი ინტელექტის გაზომვის ინსტრუმენტი

 

1970-იან წლებში ჰარვარდის უნივერსიტეტის პროფესორმა, ფსიქოლოგმა ჰოვარდ გარდნერმა, კითხვის ნიშნის ქვეშ დააყენა ინტელექტის ის ტრადიციული გაგება, რომელსაც ინტელექტის საზომი (IQ) ტესტები ეფუძნება. მან აღმოაჩინა, რომ ადამიანები დაჯილდოებულნი იყვნენ მრავალი ისეთი ნიჭითა და უნარით, რომლებიც არასაკმარისად იყო ასახული ინტელექტის ტრადიციულ გააზრებაში. გარდნერმა მრავალი სხვადასხვა წყარო გამოიყენა, მათ შორის – აუტისტებსა და ნიჭიერ ბავშვებთან დაკავშირებული ნეიროფსიქოლოგიური კვლევები, რათა გაემყარებინა საკუთარი მოსაზრება იმის შესახებ, რომ ტვინის სხვადასხვა უბანი სხვადასხვა ტიპის ინტელექტზეა პასუხისმგებელი. 1983 წელს გარდნერმა გამოაქვეყნა ნაშრომი „Frames of Mind”, სადაც შვიდი სხვადასხვა ტიპის ინტელექტი გამოყო, ხოლო ათი წლის შემდეგ მერვე ტიპი დაამატა. მისი მტკიცებით, თითოეული ადამიანი ფლობს ყველა ინტელექტს, ოღონდ სხვადასხვა დოზით. ამ თეორიის მიხედვით, ინტელექტის ტრადიციული გაზომვა შესაძლოა ტენდენციური იყოს ზოგიერთი ტიპის ინდივიდის მიმართ, რადგან არ არსებობს ორი ზუსტად ერთნაირი პროფილის მქონე ინტელექტი. ეს პროფილები ჩვენს ინდივიდუალურ გენეტიკასა და გამოცდილებას ეფუძნება და ამიტომ უნიკალურია, სხვებისაგან განსხვავებული.

ინტელექტის გაზომვა არსებული ტესტების მეშვეობით ინტელექტის რეალურ შესაძლებლობს შეზღუდულად წარმოაჩენს. მრავალმხრივი ინტელექტის თეორიის მიხედვით, არსებობს 8 ძირითადი ტიპის ინტელექტი. ესენია: ლინგვისტური, მუსიკალური, ლოგიკურ-მათემატიკური, სივრცითი, სხეულებრივ-კინესთეტიკური, ინტრაპერსონალური, ინტერპერსონალური და ნატურალისტური. ამ 8 ძირითადი ინტელექტიდან ინდივიდს შესაძლოა გამოკვეთილი ჰქონდეს ერთი ან რამდენიმე, თუმცა ყველა ერთნაირად არა. გარდნერის მიერ შემოთავაზებული მოდელი ყველა ტიპის ინდივიდს მოიცავს, გასაოცარი ნიჭიერებისა იქნება ის თუ გონებრივად ჩამორჩენილი ან ფიზიკური შეზღუდულობის მქონე. მაგალითად, გონებრივად ჩამორჩენილი ბავშვი შესაძლოა ვერ ფლობდეს გამართულ ენობრივ ფორმებს, მაგრამ შესანიშნავად ხატავდეს ან უკრავდეს სხვადასხვა მუსიკალურ ინსტრუმენტზე. ვინაიდან საგანმანათლებლო სისტემა აქცენტს მათემატიკური და ლინგვისტური ინტელექტის განვითარების მნიშვნელობაზე სვამს, მოსწავლის მიერ მიღწეული წარმატების შეფასებაც მხოლოდ ამ ორი ინტელექტის მიხედვით გაზომილ უნარებს ეფუძნება. გარდნერი და მრავალმხრივი ინტელექტის სხვა მხარდამჭერები მიიჩნევენ, რომ ამგვარი აქცენტირება არ არის სამართლიანი, რადგან, მაგალითად, ბავშვები, რომლებიც მაღალგანვითარებულ მუსიკალურ ინტელექტს ფლობენ, შესაძლოა გადაყვანილ იქნენ სპეციალური საგანმანათლებლო საჭიროებების მქონე კლასში მათემატიკასა და ენის კურსებში არასაკმარისი ქულების გამო. მასწავლებლები უნდა ეძებდნენ მოსწავლეთა შეფასების ისეთ გზებს, რომლებიც მათი ძლიერი და სუსტი მხარეების შესახებ ზუსტ წარმოდგენას მისცემთ.

ვინაიდან მოსწავლეები ერთმანეთისგან განსხვავებულად ითვისებენ შესასწავლ მასალას, არ შეიძლება მათი შეფასება ერთიანი, სტანდარტიზებული სისტემით. საჭიროა, მასწავლებელმა თითოეული მოსწავლისთვის შექმნას ე.წ. ინტელექტის პროფილები. მოსწავლეთა ინდივიდუალური ათვისების უნარის ცოდნა მასწავლებელს დაეხმარება, სათანადოდ შეაფასაოს მათი პროგრესი.

ტრადიციული ტესტები მოსწავლეებისგან მოითხოვს წინასწარგანსაზღვრული ცოდნის გამოვლენას, გარდნერის თეორიის მომხრეები კი ამტკიცებენ, რომ უნდა შეიქმნას ისეთი შეფასებითი სისტემა, რომელიც მოსწავლეებს საშუალებას მისცემს, განმარტონ სასწავლო მასალა საკუთარი ინტერპრეტაციით სხვადასხვა ინტელექტის გამოყენებით. ამ თვალსაზრისით, ტრადიციულ შეფასებით სისტემაზე ეფექტიანია სხვა მეთოდები: მოსწავლეთა პორტფოლიოები, დამოუკიდებელი პროექტები, მოსწავლეთა დღიურები, სხვადასხვა შინაარსის კრეატიული საშინაო დავალებები. სკოლების ერთ-ერთი ამოცანაა, მოსწავლეებს განუვითაროს თავდაჯერება და მიზნის მისაღწევად საჭირო უნარები. მრავალმხრივი ინტელექტის თეორია საშუალებას იძლევა, შესწავლილ იქნეს მოსწავლეთა სხვადასხვა ნიჭი და უნარები, ამასთანავე, იგი აღიარებს, რომ შესაძლოა ყველა მოსწავლე არ იყოს დაჯილდოებული ვერბალური ან მათემატიკური უნარებით; სამაგიეროდ, წარმტებულნი იყვნენ სხვა ისეთ სფეროებში, როგორებიცაა მუსიკა, სივრცული აღქმა ან ინტერპერსონალური ცოდნა. ამგვარი მიდგომა და შეფასებითი სისტემა შესაძლებლობას აძლევს ყველა მოსწავლეს, წარმატებით მიიღოს მონაწილეობა საკლასო სწავლებასა და სხვადასხვა აქტივობაში.

გარდნერი მიუთითებს, რომ სწავლის მეთოდების უფრო ფართო დიაპაზონის შემოღებით მასწავლებლებს და, რა თქმა უნდა, მშობლებსაც შეუძლიათ, უკეთ შეიცნონ ინდივიდის ძლიერი და სუსტი მხარეები და განსაზღვრონ მათთვის უპირატესი სწავლის სტილი, ეს კი საშუალებას მისცემს მოსწავლეს, უფრო ნაყოფიერად ისწავლოს.

მრავალმხრივი ინტელექტის თეორია ნევროლოგიურ, ევოლუციურ და კროსკულტურულ საფუძვლებს ემყარება. იგი მიიჩნევს, რომ სხვადასხვა ინტელექტის განვითარებაში ბიოლოგიასთან ერთად დიდ როლს ასრულებს კულტურაც. ყველა საზოგადოება სხვადასხვა ტიპის ინტელექტს აფასებს. ეს შეფასებებიც უზრუნველყოფს ამა თუ იმ სფეროში პროფესიონალად ქცევის მოტივაციის გაჩენას. შესაბამისად, შესაძლოა, რომელიმე ინტელექტი მაღალ დონეზე განვითარდეს ერთი კულტურის ბევრ სოციუმში, მაშინ როცა იგივე ინტელექტი ნაკლებად განვითარდება სხვა კულტურის ინდივიდებში.

გარდნერი აღნიშნავს, რომ მრავალმხრივი ინტელექტის იდეა სიახლეს არ წარმოადგენს. მრავალი წელია გრძელდება დებატები ერთი თუ მრავალფეროვანი ინტელექტუალური უნარების არსებობის შესახებ. ფსიქოლოგები კამათობენ ინტელექტის შემადგენელი მრავალრიცხოვანი ფაქტორებისა და კომპონენტების არსებობის შესახებაც.

გარდნერმა ინტელექტი განსაზღვრა როგორც პრობლემების გადაჭრისა და სხვადასხვა კულტურული გარემოსთვის ღირებული პროდუქტის შექმნის უნარი.


გთავაზობთ კითხვარს (The Connell Multiple Intelligence Questionnaire), რომლის გამოყენებაც შესაძლებელია უმცროსი სასკოლო ასაკის მოსწავლეებთან.
კითხვარის გასახსნელად დააწკაპუნეთ ბმულს!
ინსტრუქცია: „1”-ით აღნიშნე ყველა ის წინადადება, რომლებსაც ეთანხმები. ,,0''-ით კი რომელსაც არ ეთანხმები.

მეშვიდე დღის რეფლექსია

    დღესაც, როგორც ყოველთვის, დეტალურად განვიხილეთ საშინაო დავალება.ბატონი გიორგის დახმარებით შევადარეთ  მოსწავლის პრეზენტაციის ჩეკლისტი მოსწავლის პრეზენტაციის სლაიდშოუს. შევასწორეთ შეცდომები. ვისწავლე სლაიდშოუში გამოყენებული მასალის ავტორთა და ვებგვერდის მისამართის მითითება.
    განვიხილეთ პროექტის გეგმა, კონკრეტულად შეფასების გეგმა და სასწავლო პროცედურები.
    დავიწყეთ ფოსტაში "დისკზე" (დრაივზე) პროექტის პორტფოლიოში საჭირო ფაილების ატვირთვა. კერძოდ, "კურსის რესურსებში" ავტვირთეთ "21-ე საუკუნის უნარ-ჩვევები", სასწავლო პროექტის, ბუკლეტისა და პრეზენტაციის ბუკლეტების შაბლონები.
    გიორგის ბლოგის რესურსებში გავეცანით შეფასებებს, რომლებიც უნდა გამოვიყენოთ ჩვენი პროექტის შეფასებებში. ასევე გავეცანით პორტფოლიოს შეფასების ჩეკლისტს.

                                           

მეექვსე დღის რეფლექსია

     დეტალურად განვიხილეთ დავალება. გავეცანი ჩემთვის უცნობ word-ის ბლანკებს. ვისწავლე ტექსტზე ფოტოს, ვიდეოს ლინკის დამატება.
     კოლეგების ბლოგებზე დავტოვე კომენტარები. ასევე ვუპასუხე ჩემს ბლოგზე დატოვებულ კომენტარებს.  ჩემს ბლოგზე დავამატე გაჯეტები.
     გიორგის ბლოგზე გავეცანი შეფასების რუბრიკებს, რომელთა მიხადვითაც უნდა შევასრულო საშინაო დავალება - სასწავლო პროექტის გეგმაში შევავსებ "შეფასების გეგმას". ასევე შევქმნი მოსწავლის პრეზენტაციის ნიმუშს.

მეხუთე დღის რეფლექსია

     განვიხილეთ საშინაო დავალება. ტრენერის რჩევების გათვალისწინებით შევასწორე პროექტის გეგმაში პროცედურების მონაცემები.
    ვისწავლე ბლოგში "ჩემს დისკში"  ფაილების გახსნა, "შეფასებების" ფაილში შევქმენი "ვიცი - მინდა ვიცოდე - ვისწავლე" კითხვარი.
    გავეცანი მეოთხე მოდულის  I,  II  და III  აქტივობებს, რომლის მიხედვითაც უნდა შევასრულო საშინაო დავალება - შევადგინო მოსწავლის პრეზენტაციის ჩეკლისტი.

მეოთხე დღის რეფლექსია

      მიმოვიხილეთ საშინაო დავალება. ვისაუბრეთ შეფასების სტრატეგიებსა და ინსტრუმენტებზე. გავეცანით საავტორო უფლებების ქაოსს. ვისწავლეთ ბლოგზე მუშაობა ( სათაურის ჩაწერა, ბლოგის წაშლა, ენის, ფონისა და ფორმატის შეცვლა, გაჯეტის დამატება). მივიღეთ საშინაო დავალება.

მესამე დღის რეფლექსია

განვიხილეთ სასწავლო გეგმის პროექტის შაბლონის ის ნაწილი, რომელზეც  ვიმუშავეთ სახლში. დავაზუსტეთ პროექტისთვის მიმართულების მიმცემი საკვანძო კითხვები, რომელიც ხელს შეუწყობს მასში მოსწავლეთა ჩართულობას.  ტრენერის რჩევების გათვალისწინებით შევასწორეთ დავალება.

მეორე დღის რეფლექსია

   დავასრულეთ რეფლექსიები ბლოგზე. ბლოგის მისამართი გადავგზავნეთ ტრენერის ელ.ფოსტაზე. დამატებით რესურსებში გავეცანით "21-ე საუკუნის უნარ-ჩვევებს".

          მოვამზადეთ "გამოცემების ჩეკლისტი" საკუთარი პროექტის შესაბამისად.  მასში მოცემულ მახასიათებლებზე დაყრდნობით მოვამზადეთ სტატიები, რომელთაც მოგვიანებით განვათავსებთ ბროშურაში.

     დამუშავებული ჩეკლისტი გადავგზავნეთ ტრენერის ელ. ფოსტაზე.